Sciroccu

u viddanu... a l'umbra menzu mortu s'arramazza.

 

SCIROCCU

Chiana lentu nni l'ària 'nfuscatizza

u suli ch'è malatu di giarnazza;

a pianta ch'era virdi 'na biddizza

ci 'mpinnulìanu sutt'a botta i vrazza.

Sta dintra a rinnuledda siddiatizza,

e a tùrtura nn' u boscu nun svulazza;

u viddanu s'affanna e pp'a stanchizza,

a l'umbra menzu mortu s'arramazza.

Mi sentu nn'a pirsuna allaccarata

'na muddàcchia, 'na noia di campari,

ca dòrmiri vurria tutt'a iurnata.

E si stu focu a tramuntana 'un stuta,

e n'hai vògghia, Ssuntì, di purmuniari...

oh comu ci 'ncasciassi 'na chiuvuta!

Girolamo Giusto, Scagghi e risugghi, Milano 1933

Gaetano Masuzzo/cronarmerina